من طرف DeMoN الجمعة مارس 27, 2009 11:21 pmمقدمه
نزل من بيته شايل شيلته ودع اهله و دموعه معاه.... و لا معنداه !!!
هي هتفرق؟؟
ساب الطين و ساب الأرض و قال هيشرق بالطول و العرض!!!
ماشي يا عم
. بص لفوق و قال يارب ...طب قال ايه ؟؟؟
الغربه تكون سهله عليا ... و يصبر كل اللي ليا
و لانها مصر
ست الدنيا واحلي البلدان ... وقفت قالت ...!!!
من تاني هلم الجدعان
و هرجع أرضي بيهم ... حلوه عفيه زي زمان
طب ما نشوف ايه اللي دار ....؟؟؟؟
حدوته مصريه ....في دور أم الدنيا مصر
نورالدين محمد .... في دور ابنها المسافر للغربه
مصر
ولدي يا ضي العين يا ضنايا
شايفه في عينك دمعه حزينه
رايح فين يا حبيبي تعالى
ليه مهموم و ف ايدك شيله
ابنها
شيلتي في ايدي و همي معايا
ذل ياخدني و قلبي حزين
سايب ارضي و اهلي ورايا
دمعة عيني دي غلب سنين
مصر
عارفه يا ولدي ظروفك صعبه
بس تعالى ما تستسلمش
ما تسلمش اديك للغربه
و تروح تبعد و ما ترجعش
ابنها
لقمة عيشي في ارضك شحت
ده انا غلبان وورايا عيالي
يا ما ايديا في طينك ضحت
و لا كان بعدك ييجي علي بالي
مصر
حاساك يا ابني و قلبي بيبكي
ضحيت يا ابني عشاني كتير
بس انا امك و ده من حقي
ارضي ياولدي بتطرح خير
ابنها
حاسس بيك يا امه و شايف
بس الحوجه طريقها طويل
عقلي بيحكي بس انا خايف
يعطل فاسي و حملي تقيل
مصر
حملك انا وياك راح اشيله
سوا ع الصعب ما يستحملش
حبي و حبك هو دليله
حلمنا يوصل وما يبعدش
ابنها
خايف جدا أنا من بكره
لو ارجع ما الاقيش مكان
ابقي قضيت علي نفسي بفكره
و ارجع نادم علي اللي كان
مصر
انت يا ابني حته مني
مهما تبعدنا الليالي
ارجع يلا عيش ف حضني
نبني مجد نشوفه عالي
ابنها
مجدك يامه نفسي فيه
بس ده عايز الف ايد
نفسي اوي اني الاقيه
و يبقي عصر علينا جديد
مصر
أبدأ انت و هات الفاس
و ما يهمكش مين معاندنا
شويه شويه تلاقي الناس
فرحت بالطرح اللي في ايدنا
ابنها
هرجع ليك يا مه و اكون
ابنك سندك في الايام
و هكونلك في الجي حنون
عاشق في طينك عوام
مصر
هاغزل توب الفرح اغاني
و ابقا جميله في لبس اميره
و اعزفلك اجمل الحاني
ارجع بنت وراها ضفيره
